Humanisti zviceran bën me ngrohje qendrore shkollën e fshatit Strazhë

Projekti u realizua në baza vullnetare me nismën e dy miqve, Willy Knecht dhe Nezir Loki

Willy Knecht, zvicerani i dëshmuar tashme si mik i shqiptarëve, e ka ridëshmuar edhe njëherë përkushtimin e tij për Kosovën dhe njerëzit e saj. Së bashku me Nezir Lokin, mik i tij nga Kaçaniku, me qëndrim në Zvicër ai ka rrumbullakësuar edhe një aksion për lehtësimin e jetës së banorëve të Kosovës. “Sot, unë dhe miku im Willy Knecht e ndjejmë veten shumë krenarë”, shkruan në llogarinë e tij në fb Nezir Loki.

Pastaj, duke e sqaruar arsyen, ai më tutje tregon: “  sepse sot e realizuam një projekt të vogël por i cili do t`u shërbejë shumë nxënësve të shkollës fillore të fshatit Shtrazë të Kaçanikut”.

Bëhet fjalë për instalimin e  ngrohjes qendrore në këtë shkollë që do t`u shërbejë arsimtarëve dhe nxënësve nga klasa e parë deri në të nëntën. Më tutje Loki, i kontaktuar nga albinfo.ch sqaron se fshati  Shtrazë njihet pë dimrat e tij të  ashpër pasi që gjendet në një lartësi mbidetare prej mbi 1100 metrash…. Projekti u realizua në baza vullnetare me nismën e dy miqve, Willy Knecht dhe Nezir Loki .

Por këtu nuk duhet harruar  edhe shume donatorë zviceranë të cilët i ka mobilizuar  Willy Knecht si dhe mërgimtarët e fshatit Shtrazë, të cilët jetojnë dhe punojnë me dekada në Lucern. Me ketë rast, shton Loki, “dua  të falënderoj nga zemra humanistin Kacanikas Emrush Tafili i cili kur dëgjoi për projektin, pa asnjë hezitim ofroi 500 euro”. Ai falënderon edhe të riun nga Poroi i Tetovës, Valtrim Qazimi nga Poroi i Tetoves i cili ofroi 100 euro.

“Ne duhet të vazhdojmë edhe më tutje me këso  projektesh për t`ua përmirësuar kushtet bijve dhe bijave tona, vëllezërve e motrave në Kosovën e dashur”.

Loki thotë për albinfo.ch se gjithsej janë investuar rreth 5700 euro, gjysma e kësaj shume e siguruar nga Willy.

Willy Knecht , nga viti 1999 kur e ka vizituar për herë të parë Kosovën si ekspert për ekshumimin e viktimave të luftës, është lidhur pazgjidhshmërisht me Kosovën dhe njerëzit e saj. Nga ajo kohë ai në mënyrë të rregullt ndihmon disa familje të varfra dhe persona me nevoja të veçanta në komunën e Kaçanikut. Së fundi Knecht ka botuar një libër , shumën e fituar nga shitja e të cilit sërish ia ka dedikuar një familjeje në nevojë nga Komuna e Kaçanikut.