Hetuesit besojnë se sulmuesi në Aarau ishte i vetëm

43-vjeçari është shtetas zviceran pa sfond migrimi, siç njoftoi policia në konferencën për shtyp. Hetuesit besojnë se ishte një sulm i vetmuar

Pas të shtënave që ndodhën pas një koncerti me muzikë tekno dhe elektronike në ambient të hapur, në Aarau, policia kantonale e Aargaut po e trajton incidentin si një masakër.

Komandanti i Policisë Michael Leupold deklaroi se burri i arrestuar të hënën është pothuajse me siguri autori i krimit, transmeton albinfo.ch. I dyshuari është një shtetas zviceran 43-vjeçar që banon në kantonin e Jurës.

Sipas informacioneve aktuale, ai nuk ka lidhje të veçanta me Aargaun dhe me sa duket ka shkuar në rave rastësisht. 43-vjeçari është shtetas zviceran pa sfond migrimi, siç njoftoi policia në konferencën për shtyp.

Sipas kryeprokurorit publik, Christoph Rüedi, deklaratat e bëra nga autori i krimit gjatë marrjes në pyetje sugjerojnë një problem të shëndetit mendor. Megjithatë, kjo duhet të hetohet më tej. Një vlerësim psikiatrik është i mundshëm. Sipas Rüedit, autori i krimit i tha policisë së Jurës se kishte qenë në gjendje të dobët shëndetësore për njëfarë kohe.

Nuk ka asnjë tregues për ndonjë individ tjetër të përfshirë në sulmin e të dielës, shkruan srf.ch. Hetuesit besojnë se ishte një sulm i vetmuar.

Një grua 22-vjeçare italiane u vra në sulmin e së dielës në mbrëmje. Gjashtë persona të tjerë u plagosën. Autori i dyshuar besohet se ka qëlluar më shumë se 40 herë në turmë me një pushkë sulmi.

Autori i dyshuar i sulmit në Aarau u dorëzua në policinë kantonale të Jurës një ditë pas sulmit. Hetuesit e kishin gjurmuar më parë atë përmes informacioneve të shumta dhe duke analizuar lëvizjet e automjeteve, siç u njoftua në media të mërkurën.

Një kërkim në shkallë të gjerë u nis menjëherë pas sulmit. Në dymbëdhjetë orët e para, u morën në pyetje më shumë se 130 persona dhe u vlerësuan mbi 100 pista.

Një automjet me targa Jura u bë fokusi i hetimit. Policia gjeti tre armë zjarri në makinën e shoferit 43-vjeçar: një kallashnikov dhe dy pistoleta.

---