Haziri: LDK-ja e VV-ja janë në konsultime për një marrëveshje për presidentin

Deputeti i LDK-së thotë se bisedimet synojnë shmangien e krizës politike dhe garantimin e funksionalitetit institucional, ndërsa afati i fundit për zgjedhjen e presidentit është 28 prilli.

Deputeti i Lidhjes Demokratike të Kosovës (LDK), Lutfi Haziri, ka deklaruar se partia e tij dhe Lëvizja Vetëvendosje janë duke zhvilluar konsultime për arritjen e një marrëveshjeje lidhur me zgjedhjen e presidentit të ri të Kosovës./Albinfo.ch

Haziri tha se qëllimi i këtyre diskutimeve është arritja e një marrëveshjeje sa më të shpejtë, me synim garantimin e funksionalitetit institucional dhe shmangien e një krize politike.

Në një deklarim para seancës së Kuvendit, Haziri mohoi se në këto konsultime po diskutohet për ndarje apo ndërrim pozicionesh politike, duke theksuar se bëhet fjalë vetëm për çështjen e zgjedhjes së presidentit.

Sipas tij, bashkëpunimi politik është i domosdoshëm për të siguruar funksionimin normal të institucioneve të vendit.

Një ditë më parë, edhe kryeministri Albin Kurti kishte konfirmuar se janë në komunikim me kryetarin e LDK-së, Lumir Abdixhiku, lidhur me çështjen e presidentit, duke shtuar se rezultatet do të bëhen publike kur të arrihen.

Pas zgjedhjeve të 28 dhjetorit, subjektet politike ende nuk kanë arritur konsensus për zgjedhjen e kreut të shtetit. Seanca e fundit për zgjedhjen e presidentit u bojkotua nga opozita, ndërsa në të Vetëvendosje fillimisht propozoi Glauk Konjufcën, e më pas edhe Fatmire Kollçaku-Mulhaxha.

Seanca nuk u zhvillua deri në fund, pasi në momentin e votimit nuk ishin të pranishëm të paktën 80 deputetë, numër i kërkuar në raundin e parë dhe të dytë të zgjedhjes.

Ndërkohë, Konjufca është shprehur se është i gatshëm të tërhiqet nga gara nëse opozita arrin të propozojë një kandidat unifikues, duke theksuar se përgjegjësia për një emër konsensual i takon opozitës.

Gjykata Kushtetuese ka caktuar 28 prillin si afat të fundit për zgjedhjen e presidentit të ri nga Kuvendi i Kosovës./Albinfo.ch

---