Haradinaj: Kufijtë me vendet fqinje i kemi, s’ka nevojë për kreativitet

Në konferencën e kryministrave të Ballkanit, Ramush Haradinaj kryeministri i Kosovës ka përmendur edhe temën e kufinjëve.

Kryeministri i Kosovës, Ramush Haradinaj, ka thënë se Kosova i ka kufijtë e vet me të gjitha shtetet fqinje dhe si të tillë i respekton.

Këto komente ai i ka bërë në Durrës, duke folur në konferencën për gazetarë, pas takimit joformal të kryeministrave të rajonit.

“Kosova i ka kufijtë e vet me Shqipërinë, Maqedoninë, Malin e Zi dhe Serbinë. Ne i respektojmë kufijtë tanë dhe nuk mendoj se duhet ndonjë kreativitet i ri. I respektojmë kufijtë që i kemi”, tha Haradinaj.

Në këtë takim në Durrës, bashkëbiseduesit kanë folur kryesisht për çështje ekonomike dhe rrugën e vendeve të Ballkanit Perëndimor drejt integrimit në Bashkimin Evropian.

I pranishëm ishte edhe Komisionari i BE-së për Zgjerim, Johannes Hahn.