Haradinaj: Koha të lëvizet në aspektin ligjor për të ardhmen e FSK-së

“Kosova ka kaluar në një proces të konsultimit me të gjitha partitë politike për të ardhmen e FSK-së. Ne jemi në shtëpinë tonë dhe FSK-ja duhet parë si e jona, e të gjitha komuniteteve"

Kryeministri i Kosovës, Ramush Haradinaj, thotë se ka ardhur koha të lëvizet në aspektin ligjor për të ardhmen e FSK-së.

Këtë deklaratë i pari i ekzekutivit e ka dhënë pas takimit që ka pasur me ambasadorët e akredituar në Kosovë, të cilët bashkërisht me komandën e FSK-së i kanë informuar për rrugën që ka ndjekur Forca drejt transformimit në ushtri.

Haradinaj theksoi se të gjitha argumentet për t’i bindur serbët janë plotësuar e po ashtu janë përmbushur edhe elementet për transformimin dhe se vota kundër është vetëm çështje politike. Ai ka theksuar se Kosova dëshiron të jetë partner i paqes në vend dhe rajon dhe se FSK-ja nuk do të marrë mandatin e trupave të NATO-s.

“Kosova ka kaluar në një proces të konsultimit me të gjitha partitë politike për të ardhmen e FSK-së. Ne jemi në shtëpinë tonë dhe FSK-ja duhet parë si e jona, e të gjitha komuniteteve. Ne nuk duam të dyfishojmë punët që bën KFOR-i, por duam të jemi partner i paqes në vend dhe rajon. Arsyeja pse ju kam kërkuar të jeni prezent, ka të bëjë me informimin tuaj me përpjekjet e FSK-së brenda mandatit të saj, arritjet dhe rrugën drejt transformimit në ushtri”, është shprehur Haradinaj.