Haradinaj kërkon zbatimin e marrëveshjes për energjinë

Kryeministri i Kosovës, Ramush Haradinaj në hapje të Forumit të Tretë – “Investimet në Infrastrukturën e Energjisë” ka thënë se prioritet i Qeverisë së Kosovës është të sigurojë energji të mjaftueshme për qytetarët e Kosovës.

Ai ka deklaruar se rregullimi i marrëdhënieve në tregun e energjisë me Serbinë duhet zgjidhur në koordinim me Bashkimin Evropian. Haradinaj theksoi se mos zbatimi i marrëveshjes së Brukselit mes Kosovës dhe Serbisë po shkakton pasoja të mëdha në zhvillimin e energjisë në vend, përcjell albinfo.ch.

Sipas kreut të ekzekutivit kjo çështje duhet që të zgjidhet sa më shpejt, ngase moszbatimi i saj mund të shkaktojë ngecje në zbatimin e marrëveshjeve të tjera.

Ndërsa, ministri i Zhvillimit Ekonomik, Valdrin Lluka, ka thënë se kontrata për termocentralin Kosova e Re është bazë për t’i ofruar gjeneratës së re furnizim me energji, si edhe rehabilitimi i kapaciteteve ekzistuese në Kosova B. “Jam i bindur se periudha para nesh do te na sjellë sfida jo vetëm në energji, por edhe në rimëkëmbjen e ekonomisë. Sektori i energjisë mbetet sektori me sfidues në ekonominë tonë. Procesi i zhvendosjes në Shipitullë ishte proces i suksesshëm i cili erdhi menjëherë pas mandatit tim”, theksoi ai.