Gjykata pezullon ndalimin e burkinit në pishinat e Gjenevës

Ilustrim

Gjykata Kushtetuese e Gjenevës ka pezulluar përkohësisht zbatimin e ligjit që ndalonte përdorimin e kostumeve të gjata të notit, përfshirë burkinit, në pishinat publike të kantonit.

Vendimi u mor pas një ankese të paraqitur nga organizata Koordinimi për Not Gjithëpërfshirës, e cila argumentoi se ndalimi cenon lirinë fetare, të drejtën për zgjedhje personale, si dhe diskriminon personat që përdorin veshje mbuluese për arsye shëndetësore ose modestie.

Ligji kishte hyrë në fuqi më 30 maj dhe parashikonte që në pishinat publike të lejoheshin vetëm kostumet njëpjesëshe ose dypjesëshe që nuk mbulojnë krahët dhe nuk shtrihen poshtë gjunjëve. Edhe pse synonte ndalimin e burkinit, ai përfshinte edhe veshjet mbrojtëse kundër rrezeve UV.

Gjykata vlerësoi se zbatimi i menjëhershëm i ligjit mund të shkaktonte dëme të vështira për t’u riparuar, sidomos gjatë sezonit veror, kur pishinat publike kanë rëndësi të madhe për rekreacion dhe socializim.

Pezullimi mbetet në fuqi deri në vendimin përfundimtar të gjykatës mbi ligjshmërinë e ndalimit. Ndërkohë, ligji është kundërshtuar edhe nga pesë komuna të Gjenevës, të cilat e konsiderojnë atë cenim të autonomisë së tyre.