Gjithnjë e më shumë njerëz përdorin barëra antidepresive

Në dhjetë vitet e kaluara, konsumi në vendet e OECD-së thuajse është dyfishua. Në Gjermani madje konsumi është rritur me një faktor 2,15

Gjithnjë e më shumë njerëz përdorin medikamente antidepresive, vetëm në dhjetë vitet e fundit numri i tyre është dyfishuar. Kjo në një kohë kur efekti i tyre është i diskutueshëm. Dozat e medikamenteve për banor, në bazë të një raporti të publikuar nga OECD, Organizata për Bashkëpunimin Ekonomik dhe Zhvillimin, janë rritur me ritme të shpejta.

“Në dhjetë vitet e kaluara, konsumi në vendet e OECD-së thuajse është dyfishuar”, thotë në intervistë me DW Valerie Paris, e cila kujdeset për çështjet e farmacisë në këtë organizatë. Në Gjermani madje konsumi është rritur me një faktor 2,15.

Megjithatë, në vitin 2011, me 50 doza ditore për 1000 banorë ai ishte ende nën mesataren e OECD-së, e cila ishte 56 doza ditore. Në krye, sipas raportit janë vende si Islanda, Australia dhe Kanadaja: kështu në Islandë, në vitin 2011 ishte rreth 10 përqind e popullatës që përdori një përmirësues të gjendjes shpirtërore.

Në vitin 2000 ishin vetëm 7 përqind. Në bazë të vlerësimeve, ndërkohë janë 350 milionë vetë në të gjithë botën që vuajnë nga depresioni.