Gjermania zgjat kontrollet kufitare deri në mars 2027

Gjermania planifikon të vazhdojë kontrollet në kufijtë e saj me vendet fqinje edhe për gjashtë muaj të tjerë. Nëse Komisioni Evropian nuk kundërshton, kontrollet do të mbeten në fuqi të paktën deri në mesin e marsit 2027.

Ministri federal i Punëve të Brendshme, Alexander Dobrindt (CSU), ka njoftuar zyrtarisht Komisionin Evropian për zgjatjen e masës, ka konfirmuar një zëdhënëse e ministrisë. Lajmi ishte raportuar fillimisht nga gazeta gjermane “Bild”.

“Zhvillimet në kufijtë e jashtëm evropianë tregojnë se frenimi i migracionit të paligjshëm vazhdon të kërkojë kontrolle”, ka deklaruar Dobrindt për “Bild”.

Ministri e kishte paralajmëruar këtë hap që në fund të korrikut, pas zhvillimeve në kufirin mes Marokut dhe enklavës spanjolle Ceuta në Afrikën e Veriut.

Kontrollet në kufijtë me nëntë vendet fqinje

Gjermania aktualisht kryen kontrolle në kufijtë tokësorë me të nëntë vendet fqinje. Kjo do të thotë se masa prek edhe kufirin Gjermani-Zvicër.

Në parim, brenda zonës Schengen kufijtë duhet të kalohen pa kontrolle të rregullta kufitare. Megjithatë, shtetet mund të rikthejnë përkohësisht kontrollet në rrethana të caktuara.

Kontrollet në të gjithë kufijtë tokësorë të Gjermanisë u vendosën më 16 shtator 2024 nga ministrja e atëhershme e Punëve të Brendshme, Nancy Faeser (SPD), me arsyetimin e kufizimit të hyrjeve të parregullta në vend.

Në disa kufij, përfshirë atë me Zvicrën, kontrollet ishin vendosur edhe më herët.

Pavarësisht kritikave ndaj masës, kontrollet janë zgjatur disa herë. Afati aktual është deri më 15 shtator 2026.

Nëse Komisioni Evropian nuk kundërshton njoftimin e ri të qeverisë gjermane, kontrollet do të vazhdojnë edhe për gjashtë muaj të tjerë, deri në mesin e marsit 2027.

Për udhëtarët që hyjnë në Gjermani nga Zvicra kjo nënkupton se kontrollet policore në kufirin gjermano-zviceran do të vazhdojnë dhe, varësisht nga fluksi dhe situata në pikat kufitare, mund të ketë edhe vonesa gjatë kalimit.

---