Gjermania vaksinon mbi 1 milion banorë për një ditë

Megjithatë, kjo nuk është ende e mjaftueshme për të arritur imunitetin e tufës në Gjermani

Ndërkohë që vendi ndodhet në një bllokim të ashpër, procesi i vaksinimit në Gjermani ka nisur të marrë hov.

Kështu, dje, në vendin me popullatën më të madhe në Evropë, janë vaksinuar më shumë se një për qind e banorëve, brenda një dite, shkruan srf.ch duke iu referuar burimeve gjermane.

Sipas ministrit federal të Shëndetësisë, Jens Spahn, më shumë se një milion njerëz janë vaksinuan në një ditë për herë të parë. Kjo ka ndodhur të mërkurën, transmeton albinfo.ch.

Me 1.1 milion vaksina, kjo prek shumë më tepër se një për qind të popullsisë së përgjithshme (rreth 84 milionë banorë), ka theksuar Spahn në Berlin.

Më shumë se një në katër gjermanë (25.9%) deri më tani janë vaksinuar të paktën një herë.

Kjo tregon se “sa kemi fituar shpejtësinë”, ka shtuar ai. Megjithatë, as kjo nuk është ende e mjaftueshme për të arritur imunitetin e tufës në Gjermani.

---