Gjermania planifikon strategji të re rreth pandemisë

Gjermani - unsplash - photo by Florian Wehde

Shtetet gjermane dhe Qeveria federale do të takohen për të diskutuar përgjigjen e vendit ndaj koronavirusit brenda javës së ardhshme, deklaroi zëvendëskancelari Olaf Scholz.

Gjermania po nxiton t’i përgjigjet një rritjeje të rasteve, pasi autoritetet shëndetësore paralajmërojnë se spitalet së shpejti mund të fillojnë të vihen nën presion të madh, raporton Dpa, transmeton Albinfo.ch.

Ka pasur më shumë se 50 000 infeksione të reja me koronavirus në 24 orët e fundit, sipas të dhënave zyrtare të publikuara, shifra që shënojnë një rekord të ri ditor.

“Virusi është ende mes nesh dhe kërcënon shëndetin e qytetarëve’’, shtoi Scholz, i cili foli gjithashtu në favor të një fushate të madhe të përbashkët dhe për më shumë vaksinime.

Kancelarja Angela Merkel, e cila mbetet në detyrë me kapacitet të kufizuar kujdestarie, ka bërë thirrje për bisedime mes kryeministrave të 16 landeve dhe Qeverisë federale.

Scholz është kancelari i ardhshëm i supozuar i Gjermanisë, por ende nuk ka nënshkruar një marrëveshje koalicioni, pas zgjedhjeve parlamentare të shtatorit.