Gjermania ndan 5 milionë euro grant për modernizimin e rrjetit energjetik në Kosovë

Marrëveshja e nënshkruar me KfW do të mbështesë KOSTT-in në zhvillimin e infrastrukturës së transmetimit të energjisë elektrike.

Ministria e Financave e Kosovës ka nënshkruar një marrëveshje granti në vlerë prej 5 milionë euro me Bankën Gjermane për Zhvillim (KfW), për financim shtesë të projektit “Zhvillimi i sektorit të energjisë – Faza VII: Përmirësimi i Rrjetit të Transmetimit”.

Projekti do të zbatohet nga Operatori i Sistemit, Transmisionit dhe Tregut të Energjisë Elektrike të Kosovës (KOSTT) dhe synon modernizimin e rrjetit të transmetimit, rritjen e sigurisë dhe besueshmërisë së furnizimit me energji elektrike, si dhe avancimin e integrimit të tregut energjetik.

Ministri në detyrë i Financave, Hekuran Murati, vlerësoi mbështetjen e Qeverisë Gjermane përmes KfW-së, duke theksuar se financimi i ri do të ndihmojë në realizimin e investimeve prioritare dhe forcimin e qëndrueshmërisë së sistemit energjetik të Kosovës.

Nga ana tjetër, drejtori i KfW-së për Kosovë, Moritz Remé, rikonfirmoi përkushtimin e institucionit që përfaqëson për të vazhduar mbështetjen ndaj modernizimit të sektorit energjetik në vend.

Edhe kryeshefi ekzekutiv i KOSTT-it, Trim Tërnava, tha se projektet po zbatohen sipas planit dhe se financimi shtesë do të krijojë mundësi të reja për zhvillimin e mëtejshëm të rrjetit të transmetimit, duke rritur kapacitetet e tij dhe sigurinë e sistemit elektroenergjetik.

Sipas Ministrisë së Financave, ky grant është pjesë e angazhimit për sigurimin e financimeve për projekte strategjike që kontribuojnë në forcimin e sigurisë energjetike dhe zhvillimin e qëndrueshëm të infrastrukturës kritike në Kosovë.

---