Gjermani: 200 miliardë euro ndihma për qytetarë dhe kompanitë gjermane

Sot është vendosur krijimi i një Fondi për ndihmën e qytetarëve dhe kompanive gjermane

Sot, Bundestagu gjerman ka vendosur për krijimin e një Fondi për ndihmën e qytetarëve dhe kompanive, për shkak të krizës energjetike, përcjell albinfo.ch.

Thuhet se fondi është miratuar, ndonëse kjo është në kundërshtim me Kushtetutën, sepse ajo parashikon frenimin e borxheve. Por një hap i tillë lejohet në një “situatë të jashtëzakonshme emergjente”. Për mundësinë e futjes në borxhe të reja votuan 390 deputetë, kundër 239 dhe abstenuan 36 deputetë.

Ndërkohë, qeveria gjermane e justifikon heqjen e sërishme të rregullit për frenimin e borxhit me efektet e agresionit rus në Ukrainë në çmimet e energjisë. Sipas vendimit, rritja drastike e çmimeve paraqet një barrë të konsiderueshme, ndonjëherë kërcënuese për vetë ekzistencën e njerëzve që preken nga çmimet e larta, por edhe të kompanive në Gjermani.

Vendimi i sotëm parashikon krijimin e Fondit për Stabilizim ekonomik (WSF), ku do të paguhen 200 miliardë euro të marra kredi. Këto para ishin parashikuar më parë për luftimin e pasojave të pandemisë Corona, ndërsa tani do të derdhen në këtë fond. Fondet mund të përdoren deri në mesin e vitit 2024. Krahas frenimit të çmimit të gazit, do të financohet pjesërisht edhe frenimi i çmimit të energjisë elektrike, si dhe ndihma për kompanitë si dhe importuesit e gazit, të cilat janë futur në telashe si pasojë e krizës energjetike.

/Albinfo.ch

---