Gjermania ndan 100 miliardë euro për ushtrinë

Marrëveshja synon krijimin e një fondi të posaçëm për prokurimet ushtarake, që gjithashtu do t’i lejojë Berlinit të përmbushë objektivin e NATO-s për shpenzimin e 2 për qind të GDP-së në fushën e mbrojtjes.

Qeveria gjermane dhe opozita konservatore kanë rënë dakord për marrëveshjen e lëvrimit të 100 miliardë eurove për modernizimin e ushtrisë përballë kërcënimit rus.

Akordi, që parashikon ndryshimin e rregullave buxhetore në kushtetutën kombëtare, u arrit pas disa javë negociatash të vështira mes partive në pushtet dhe konservatorëve të ish-kancelares Angela Merkel.

Tre ditë përpara se Rusia të pushtonte Ukrainën, në muajin shkurt, kancelari Olaf Scholz u zotua për shpenzimin e një buxheti prej 100 miliardë eurosh për të riarmatosur ushtrinë dhe për rinovimin e armatimeve të vjetruara të saj, raporton Euronews, përcjell Albinfo.ch.

Por që prej atëherë kritikët kanë akuzuar Scholz për ndrojtje në mbështetjen e Kievit dhe për dështim në marrjen e hapave konkrete për furnizimin me armë.
Fondi i jashtëzakonshëm do të financohet nga një borxh shtesë. Për këtë është e nevojshme një “shkelje” e rregullave të borxhit në kushtetutën e vendit, që i vendos kufi qeverisë në marrjen e huave.

Për këtë arsye qeverisë i duhej mbështetja e opozitës konservatore, për të siguruar mazhorancën prej dy të tretash në Parlament, e nevojshme për të kaluar amendamentet kushtetuese.

---