Gjermania i dërgon 4 mijë dronë në Ukrainë

Keystone (AP Photo/David Goldman)

Gjermania ka financuar “një dërgesë të fshehtë” prej 4 mijë dronëve në Ukrainë. Vendi kishte porositur dronë me inteligjencë artificiale në shtator nga kompania Helsing, të cilët janë paguar përmes një fondi të qeverisë gjermane.

Ministri gjerman i Mbrojtjes, Boris Pistorius, ka konfirmuar dërgesën, duke theksuar se është i lumtur se kjo po ndodh, kur kërkesat janë rritur dukshëm, shkruan Bild.

Dronët, të cilët njihen si “mini Taurus”, kanë marrë emrin e raketave më rreze të gjatë veprimi që kancelari gjerman Olaf Scholz ka refuzuar të sigurojë për Ukrainën, pavarësisht presioneve të mëdha për ta bërë një gjë të tillë, transmeton albinfo.ch.

Ndryshe, Gjermania është donatori i dytë më i madh i ndihmës ushtarake për Ukrainën pas Shteteve të Bashkuara, por qëndrimi për dërgimin e raketave me rreze të gjatë veprimi ka mbetur i pandryshuar te kancelari gjerman.