Gjendet e vdekur pranë foshnjës së saj 7-muajshe

Një grua 30-vjeçare është gjetur e vdekur në banesën e saj të hënën. Shoku i saj është duke u kërkuar nga policia

Pas vrasjes së dyfishtë që ndodhi në fund të shtatorit 2016 në Yverdon, një dramë e re tronditi qendrën e qytetit këtë të hënë. Një grua 30-vjeçare është gjetur e vdekur në banesën e saj nga një i afërm. Ky i fundit thirri policinë në orën 14:40, pasi që kishte zbuluar skenën e tmerrshme. Afër viktimës ishte foshnja e saj 7-muajshe, e cila ishte e padëmtuar.
Pasi shkuan në vendin e ngjarjes, policia kantonale thotë se “në këtë fazë të hetimit nuk mund të shprehen rreth rrethanave apo shkakut të saktë të vdekjes”. Ajo gjithashtu thekson se “në mënyrë aktive ata janë duke kërkuar “shokun” e gruas së re. Fëmija i saj është marrë nën kujdes.

Një hetim penal është hapur nga prokurori i shërbimit. Hetimet janë kryer nga hetuesit policorë të sigurisë dhe specialistët e Brigadës së Policisë Shkencore në bashkëpunim me Qendrën Universitare të Mjekësisë Ligjore.