Gjenden eshtra mbi 200 vjeçarë në një qese plastike

Policia ende nuk e ka përgjigjen se nga kush janë futur eshtrat në qese dhe cili do të ketë qenë motivi i këtij veprimi

Policia Kantonale e Cyrihut është duke u marrë me një gjetje të jashtëzakonshme. Para gjashtë muajsh një shëtitës në pyll ka gjetur një qese plastike të mbuluar nga myshku, të mbushur me eshtra njeriu.

Instituti për mjekësinë ligjore i Cyrihut ka analizuar këta eshtra dhe ka ardhur në përfundim se ata u takojnë dy njerëzve që kanë jetuar para 200 deri 400 vitesh.

Kjo nënkupton se njerëzit në fjalë kanë jetuar në kohën kur nuk ka ekzistuar plastika.

Nisur nga kjo, policia ende nuk e ka përgjigjen se nga kush janë futur eshtrat në qese dhe cili do të ketë qenë motivi i këtij veprimi. Ajo që mund të konstatohet, sipas policisë, është se qesja  në vendin ku është gjetur ka qëndruar prej disa dekadash.