Gërvalla: Diaspora do të bëhet pjesë e ndryshimeve pozitive në Kosovë

Në një intervistë për median zvicerane nzz.ch, Gërvalla ka deklaruar se edhe pjesëmarrja e diasporës në zgjedhje do të jetë më e lehtë

Ministrja e Jashtme e Kosovës, Donika Gërvalla Schwarz, ka shprehur përkushtimin e Qeverisë Kurti që ta bëjë diasporën pjesë të ndryshimeve pozitive në Kosovë.

Në një intervistë për median zvicerane nzz.ch, Gërvalla ka deklaruar se edhe pjesëmarrja e diasporës në zgjedhje do të jetë më e lehtë.

“Në të ardhmen Kosova duhet të përfitojë jo vetëm nga transferimet e parave, por edhe nga njohuritë e kosovarëve të trajnuar mirë jashtë vendit, për shembull duke marrë funksione të ndryshme nëpër institucionet shtetërore ose duke ardhur këtu si investitorë. Pjesëmarrja në zgjedhje gjithashtu duhet të bëhet më e lehtë për diasporën dhe të bëhet e mundur që ata të votojnë në ambasadat dhe konsullatat e vendit. Do të ketë një ligj të ri zgjedhor këtë vit”, ka deklaroi ajo, përcjell Albinfo.ch.

Një çështje për të cilën Gërvalla ka folur ka qenë edhe tema e vrasjeve politike të pasluftës.

“Bashkë me të tjerët, unë kam kërkuar vazhdimisht që vrasjet politike pas përfundimit të luftës të hetohen plotësisht. Duhet të ketë drejtësi për të gjithë. Ne kemi nevojë për këtë, për procesin e brendshëm të shërimit të shoqërisë sonë”, tha Gërvalla.

---