Fushatë kundër fotografimit në pishina

Një veprim i tillë mendohet të merret për të parandaluar që fotografitë e realizuara në këto ambiente, të përhapen në mënyrë të palejueshme nëpër rrjete sociale

Pishinat e Zvicrës u shpallin luftë fotografimeve dhe xhirimeve. Ajo që në shumë nga republikat e Gjermanisë tashmë është bërë rregull, pritet të aplikohet edhe në Zvicër: pritet të ndalohet fotografimi dhe xhirimi në pishina. Kjo nënkupton që smartfoni të mbetet në çantë, te gardëroba ose ai mund edhe të merret me vete por vetëm pasi që t`i mbulohet lenta e kamerës ose “syri” i saj me një shirit special, shkruan srf.ch.

Një veprim i tillë mendohet të merret për të parandaluar që fotografitë e realizuara në këto ambiente, të përhapen në mënyrë të palejueshme nëpër rrjete sociale, transmeton albinfo.ch. Në fakt edhe tash në Zvicër, në shumë pishina të hapura është e ndaluar të fotografohet ose të xhirohet. Por kjo ndalesë respektohet fare pak.

“Në një ditë vere, kur i ke 2000 deri 3000 frekuentues në pishinë, është shumë e vështirë për një roje pishine që t`i kontrollojë ata”, thotë Christoph Leupi nga Bashkësia e pishinave të hapura dhe të mbuluara. Kjo shoqatë synon që me një fushatë të veçantë  të luftojë kundër kësaj gjendjeje.

Javën që vjen ajo fillon aksionin me pllakate  dhe fletëpalosje, përcjell albinfo.ch. Kjo, pasi që shumë vizitorë të pishinave nuk janë të vetëdijshëm se është e ndaluar t`i fotografosh të tjerët në pishinë.

Ndryshe, fotografimi i vetes ose “selfie” në pishina do të vazhdojë të mbetet i lejuar.