Forcat ajrore të Zvicrës zbresin në tokë avionin e dyshimtë

Alarmi ka ardhur nga Italia, forcat ajrore të së cilës kishin njoftuar homologët zviceranë se në hapësirën ajrore të Tirolit Jugor ndodhej një avion privat që nuk posedonte radiolidhje

Një aeroplan privat pa radiolidhje ka shkaktuar të dielën ndërhyrjen e aeroplanëve ushtarakë të Zvicrës. Avioni i vogël po fluturonte nga Bejruti (Liban) për në Paris. Për shkakun se në atë kohë në Francë ishin duke u zhvilluar zgjedhjet, forcat ajrore të Zvicrës ishin veçanërisht të mobilizuar dhe  syçelë, shkruan sda.ch.

Autoritetet e forcave ajrore kishin marrë alarmin rreth orës 10.20 të të dielës. Ai i ka ardhur nga Italia, forcat ajrore të së cilës kishin njoftuar homologët zviceranë se në hapësirën ajrore të Tirolit Jugor ndodhej një avion privat që nuk posedonte radiolidhje. Pas kësaj, qendra e mbrojtjes ajrore ka nisur një “Hot Mission” për të sqaruar gjendjen në lartësinë ajrore, thuhet në një njoftim të Departamentit Federal të Mbrojtjes (VBS).

11 minuta më vonë është ngritur në ajër nga Payerne një avion luftarak i tipit F/A-18 i Shërbimit Policor ajror të ushtrisë. Pasi që kishin dështuar disa përpjekje për ta kontaktuar ekuipazhin e avionit, janë njoftuar edhe forcat ajrore franceze dhe ato gjermane. Në fund, siguria ajrore e Cyrihut ia ka dalë të vendosë kontaktin përmes radiolidhjes me avionin e përmendur. Por, për shkak të situatës politike të sigurisë, është vendosur që aksioni të vazhdonte.