Flamuri shqiptar valëvitet në Leesburg, Virxhinia

Ceremonia e ngritjes së flamurit në qytetin e Leesburg, SHBA

Me rastin e 110 vjetorit të Ditës së Flamurit, komuniteti shqiptaro-amerikan në shtetin e Virxhinias, në një organizim të kuruar në detaje, zhvilloi ceremoninë e ngritjes së flamurit në qytetin e Leesburg, Virxhinias, shkruan albinfo.ch.

Në event mori pjesë Ambasadorja Floreta Faber, Prokurorja e kauntit të Loudon Buta Biberaj,  përfaqësues të Ambasadës së Kosovës dhe Drejtori i Zërit të Amerikës për Euro-Azinë, z. Elez Biberaj.

Në fjalën e rastit përshëndetëse, ambasadorja Floreta Faber përcolli urimet e rastit për 110-vjetorin e Festës së Flamurit dhe shprehu kënaqësinë që kjo ceremoni është kthyer në traditë tashmë. Ajo shprehu vlerësime për organizmin e këtij komuniteti, i cili po rritet çdo ditë e më shumë. Në këtë vit u festua dhe 100-vjetori i vendosjes së marrëdhënieve diplomatike mes Shqipërisë dhe Shteteve të Bashkuara, vendi i parë që e njohu Shqipërinë si shtet i pavarur dhe kurorëzoi njohjen e pavarësisë së Shqipërisë në arenën ndërkombëtare mbi një shekull më parë.

Aktiviteti  u shoqërua nga një program i shkurtër artistik dhe një drekë me anëtarët e komunitetit shqiptaro-amerikan.  Një falënderim i veçantë për znj. Merita McCormic, Kreda Boci, Anisa Papadhima, të gjithë komitetin organizativ dhe veçanërisht të rinjtë që morën pjesë dhe e gjallëruan festën.

Gëzuar 110-vjetorin e Pavarësisë, e dashur Shqipëri!

---