Fatjona Matraku, zë i kulturës shqiptare në Francë

Pianistja Fatjona Matraku vlerësohet për promovimin e identitetit shqiptar në Francë

Pianistja dhe mësuesja shqiptare Fatjona Matraku, e vendosur prej vitesh në Francë, është pritur në takim zyrtar nga Ambasadori Halimi, në një aktivitet kushtuar vlerësimit të kontributit të saj në fushën e artit dhe diplomacisë kulturore, transmeton albinfo.ch.

E njohur për projektet e saj artistike që ndërthurin muzikën klasike me identitetin kulturor shqiptar, Matraku është vlerësuar për rolin e saj në promovimin e trashëgimisë sonë në skenat evropiane dhe mesdhetare.

Gjatë takimit, ambasadori theksoi se, ndonëse vjen nga Tirana, veprimtaria e saj e shtrin përfaqësimin kulturor përtej kufijve, duke u bërë zë i të gjitha komuniteteve shqiptare në diasporë.

Po ashtu, palët diskutuan mundësitë për bashkëpunime të reja kulturore, si dhe mënyrat konkrete për promovimin e artit dhe trashëgimisë shqiptare në Francë dhe në rajon.

Ambasada shprehu vlerësim të posaçëm për angazhimin e vazhdueshëm të Fatjona Matrakut, duke garantuar mbështetje për iniciativat që kontribuojnë në forcimin e pranisë së kulturës shqiptare jashtë vendit./Albinfo.ch

---