Elmer në paraburgim për dorëzimin e sekretit bankar

Elmer i ka dorëzuar Wikileaks-it të dhëna sekrete të bankës ku ka punuar më parë dhe dyshohet se ka shkelur detyrimin e sekretit bankar

Ish bankierit Rudolf Elmer, i cili është arrestuar të mërkurën, i është shqiptuar të shtunën masa e paraburgimit. Ky vendim i gjyqtarit hetues u është kumtuar palëve pasditën e djeshme.

Elmer ngarkohet me dyshimin se i ka dorëzuar udhëheqësit të Wikileaks-it, Julian Assange, të dhëna sekrete të bankës private Julius Bär, ku ai ka punuar më parë. Me këtë veprim, ai dyshohet se ka shkelur detyrimin për ruajtjen e sekretit bankar.

Masa e paraburgimit i është shqiptuar atij për shkak të ekzistimit të dyshimit se ka rrezik për t`i zhdukur dëshmitë, shkruan tagesanzeiger.ch.

Siç ka deklaruar avokatja e tij, Elmer do të ushtrojë ankesë në Gjykatën Supreme të Kantonit të Cyrihut. Bankieri Elmer të mërkurën i ishte shqiptuar një dënim me kusht me të holla, por, pas lirimit, ai sërish ishte arrestuar nga policia.