Ekspozita BESA, edhe për trupin diplomatik në Bernë

Në pritje kanë marrë pjesë diplomatë nga Holanda, Suedia, Norvegjia, Turqia, Gjeorgjia, Franca, Belgjika si dhe përfaqësues të institucioneve zvicerane dhe të Departamentit Federal për Punë të Jashtme

Më 11 dhjetor 2014, nga ambasadorët e Izraelit, Shqipërisë dhe Kosovës është organizuar një pritje për trupin diplomatik në Zvicër në kuadër të  ekspozitës “Besa”. Kjo ekspozitë ë bën fjalë për shpëtimin e hebrenjve në Shqipëri dhe në Kosovë gjatë Luftës së Dytë Botërore është projekt i mbështetur nga dhe i përkrahur nga memoriali Yad Vashem. Pritja e diplomatëve është bërë bashkërisht nga Ambasadori Malaj dhe Ambasadori Caspi i Izraelit (për arsye shëndetësore mungonte Ambasadori shqiptar Ilir Gjoni).

Në këtë ekspozitë, kanë marrë pjesë diplomatë nga vende si Holanda, Suedia, Norvegjia, Turqia, Gjeorgjia, Franca, Belgjika si dhe shumë përfaqësues të institucioneve zvicerane dhe të Departamentit Federal për Punë të Jashtme.

Sekretari i Përgjithshëm i Departamentit Zviceran për punë të Jashtme, z. Benno Bättig, ka mbajtur një fjalë rasti gjatë së cilës ka lavdëruar këtë ekspozitë “e cila përshkruan më shumë komunitetin shqiptar në përgjithësi”, duke theksuar që “i vetmi vend në Evropë ku kishte më shumë hebrenj në vitin 1945 se sa në vitin 1939 ishin trojet shqiptare”. Ai ka shtuar po ashtu që është një shembull i mirë se si një popull ka rrezikuar vetveten për t’i ardhur në ndihmë një populli tjetër i cili ishte i rrezikuar.

Para të pranishmëve, është mbajtur edhe një fjalë nga një dëshmitare e shpëtimit të hebrenjve në Shqipëri dhe Kosovë, nga znj. Lamija Jaha, familja e së cilës kishte strehuar hebrenj gjatë Luftës së Dytë Botërore. Babai i saj është nderuar me titullin “Righteous among the Nations” (Të drejtët në mesin e popujve).

Ekspozita Besa është prezantuar nga Esther Hörnliman, atashe kulturore në Ambasadën Izraelite dhe Sandra Hoffmann, koordinatore e projektit “Besa”.