Efekti Trump: Zviceranët po i shmangen gjithnjë e më shumë udhëtimeve në SHBA

Numri i turistëve zviceranë që udhëtojnë drejt Shteteve të Bashkuara ka rënë ndjeshëm, ndërsa industria e turizmit e lidh këtë prirje edhe me situatën politike dhe presidencën e Donald Trump

Vetëm 120 mijë udhëtarë nga Zvicra vizituan Shtetet e Bashkuara nga janari deri në fund të qershorit 2026. Kjo paraqet një rënie prej 16.5% krahasuar me të njëjtën periudhë të vitit të kaluar, sipas Andrea Beffa, drejtoreshë menaxhuese e Shoqatës Zvicerane të Udhëtimeve (SRV).

Rënia kishte nisur që në vitin 2025, kur numri i hyrjeve të zviceranëve në SHBA ra me 10.6%, në pak më shumë se 361 mijë. Nëse tendenca aktuale vazhdon deri në fund të vitit, gjatë 2026-s priten rreth 300 mijë udhëtime nga Zvicra drejt SHBA-së, afërsisht sa niveli i vitit 2007, shkruan swissinfo.ch, transmeton albinfo.ch.

Kjo do të nënkuptonte se, krahasuar me vitin 2024 kur u regjistruan 404,434 hyrje nga Zvicra, SHBA-ja do të kishte humbur rreth një të katërtën e turistëve zviceranë në dy vjet. Të ardhurat nga udhëtimet drejt SHBA-së gjatë 2026-s gjithashtu pritet të jenë rreth 20% më të ulëta se një vit më parë.

65% nuk planifikojnë të udhëtojnë në SHBA

Një sondazh i Allianz Partners tregon gjithashtu rritje të skepticizmit: 65% e të anketuarve zviceranë thonë se për momentin nuk planifikojnë të udhëtojnë në SHBA, krahasuar me 53% një vit më parë. Ndërkohë, 7% deklarojnë se synojnë ta anulojnë një udhëtim të planifikuar, nga vetëm 2% vitin e kaluar.

Pavarësisht rënies së interesimit për SHBA-në, dëshira e zviceranëve për udhëtime të largëta mbetet e lartë. Destinacionet në Azi dhe Oqeanin Indian po shënojnë rikuperim të rezervimeve, ndërsa sektori pret kërkesë më të fortë gjatë vjeshtës 2026 dhe dimrit 2026/27.

---