Dy vjet burg për mjekun që infektoi pacientët në Gjermani

Një anesteziolog gjerman u dënua të premten me dy vjet burgim të pezulluar për lëndim të rëndë trupor, pasi ai infektoi me hepatitin C dhjetëra pacientë të tij.

Mjeku 61-vjeçar besohet se ka infektuar 51 nga rreth 1,700 pacientë që i ka vënë në gjumë për operacion midis shkurtit 2017 dhe prillit 2018, shkruan DW.

Prokuroria kishte kërkuar tre vjet burg dhe po shqyrton ankimimin e vendimit.

Gjykata rajonale e Augsburgut në shtetin jugor gjerman të Bavarisë dënoi gjithashtu mjekun për përvetësim.

Ai besohet të ketë vjedhur opiate nga spitali Donau-Ries ku punonte, më vonë duke injektuar veten për të trajtuar një sëmundje të dhimbshme të zorrëve. Simptomat besohet se janë shkaktuar nga hepatiti C, megjithëse mjeku thuhet se nuk ishte në dijeni të infeksionit të tij në atë kohë, përcjell albinfo.ch.

Gjykata supozoi se ai e kishte kontraktuar pa vetëdije sëmundjen nga një pacient, dhe më pas e përhapi atë pa e ditur.

Hepatiti C është një sëmundje e mëlçisë e shkaktuar nga një virus shpesh i pazbuluar.