DokuFest dhe Kino Kosova lansojnë nismën “Re-Connect” për të rinjtë nga Kosova dhe diaspora

Pjesëmarrja është falas, dhe të gjitha shpenzimet e udhëtimit, akomodimit dhe ushqimit do të mbulohen nga organizatorët

DokuFest, në bashkëpunim me Kino Kosova, ka shpallur thirrjen për aplikime për Re-Connect, një program bashkëpunues për krijimin e filmave që ofron një përvojë praktike dhe unike në rrëfimin e historive nëpërmjet formatit dokumentar.

Përmes një kombinimi të punëtorive, ligjëratave dhe krijimit të filmave në grup, pjesëmarrësit do të eksplorojnë temat e identitetit, trashëgimisë së përbashkët, të drejtat e njeriut dhe diversitetit kulturor, thuhet në njoftimin e organizatorëve, transmeton albinfo.ch. Pjesëmarrësit do të fitojnë aftësi praktike në rrëfimin e historive, kinematografi, zërin, montazhin dhe krijimin e filmave etikë.

Të rinjtë e moshës 18 deri 25 vjeç, me interes për të eksploruar identitetin dhe rrënjët e tyre kulturore, ftohen të aplikojnë për këtë punëtori dyjavore që do të mbahet në Prizren, nga 8 deri më 21 qershor 2025. Nuk kërkohet përvojë e mëparshme në filmbërje – vetëm pasioni për tregime dhe bashkëpunim.

Gjatë programit, pjesëmarrësit do të punojnë në grupe për të krijuar filma dokumentarë të shkurtër nën mentorimin e profesionistëve nga Kosova dhe diaspora. Përveç aftësive teknike dhe krijuese në fushën e filmit dokumentar, të rinjtë do të përjetojnë një zhytje të thellë në tema si identiteti, trashëgimia, të drejtat e njeriut dhe diversiteti kulturor.

Pjesëmarrja është falas, dhe të gjitha shpenzimet e udhëtimit, akomodimit dhe ushqimit do të mbulohen nga organizatorët. Programi do të zhvillohet në gjuhën angleze.

Filmat e realizuar do të kenë premierën në edicionin e ardhshëm të DokuFest në gusht 2025.

Afati për aplikim është 19 maj 2025.
Aplikimi bëhet përmes formularit online: https://forms.office.com/r/h7BSztEv00

 

---