Djegia e flamujve ndalohet me ligj në Gjermani

Ky ligj u soll për miratim nga deputetët, pasi protestuesit i dogjën flamujt e Izraelit në rrugët e Berlinit.

Parlamenti i Gjermanisë e ka miratuar ligjin, me të cilin djegia e flamujve të shteteve të huaja është shkelje e dënueshme. Sipas ligjit të ri, ata që e bëjnë këtë vepër, mund të dënohen me tre vjet burgim.

“Në Gjermani, flamuri izraelit nuk lejohet të digjet”, tha Johannes Fechner, zëdhënës për politika ligjore i Partisë Socialdemokrate.

Ministrja e Drejtësisë, Christine Lambrecht, tha se djegia e flamujve në hapësira publike nuk ka të bëjë asgjë me protestat paqësore. Sipas saj, qëllimi i këtyre gjesteve është që të nxiten urrejtja, zemërimi dhe agresioni, shkruan “Dw”, përcjell albinfo.ch.

Para miratimit të këtij ligji, Kodi penal i Gjermanisë ofronte mbrojtje për simbolet e Republikës federale dhe të shteteve të tjera me kushte të caktuara. Për shembull, për ta mbrojtur flamurin e një shteti, Gjermania duhej të kishte marrëdhënie diplomatike me të.

Me ligjin e ri synohet mbyllja e këtij boshllëku dhe ofrimi i mbrojtjes edhe për flamurin e Bashkimit Evropian, që është djegur gjatë protestave të euroskeptikëve dhe përkrahësve të së djathtës ekstreme.

Partia e vetme që votoi kundër këtij ligji ishte partia e së djathtës ekstreme, AfD (“Alternativa për Gjermaninë”). Sipas tyre, ky ligj është në kundërshtim me lirinë e të shprehurit dhe kreativitetit artistik.

---