Deputetët propozojnë “taksë sigurie” për të huajt në Zvicër

Nisma e SVP-së kalon në Këshillin Kombëtar, por duhet miratimi i Këshillit të Shteteve për t’u bërë realitet

Këshilli Kombëtar i Zvicrës ka miratuar të enjten një mocion të propozuar nga Partia Popullore Zvicerane (SVP), i cili parashikon vendosjen e një “takse sigurie” për shtetasit e huaj që jetojnë në Zvicër, përcjell albinfo.ch.

Sipas propozimit, kjo taksë do të modelohej sipas sistemit të taksës së përjashtimit nga shërbimi ushtarak, të cilën e paguajnë të gjithë burrat që nuk shërbejnë në ushtri.

Parametrat e njëjtë do të përdoren për të llogaritur shumën që duhet paguar, si dhe kohëzgjatjen e detyrimit tatimor.

Megjithatë, kjo nismë ende nuk është përfundimtare, pasi duhet të kalojë edhe votimin në Këshillin e Shteteve para se të hyjë në fuqi.

Debati për këtë propozim vjen në një moment kur çështjet e migracionit dhe sigurisë po zënë gjithnjë e më shumë hapësirë në politikën zvicerane. /Albinfo.ch

---