Dënohet boshnjaku për propagandë islamike

Ai, siç ka konstatuar Prokuroria Federale, kishte bërë propagandë për predikues islamikë nga vendi i tij i prejardhjes dhe për organizata terroriste

Keystone

Një qytetar i Bazelit, me prejardhje nga Bosnja është dënuar me gjashtë muaj burg me kusht  dhe me gjobë prej 8000 frangash për veprën penale propagandë islamike.

Ai, siç ka konstatuar Prokuroria Federale, kishte bërë propagandë për predikues islamikë nga vendi i tij i prejardhjes dhe për organizata terroriste. Fjala është për organizatat e shpallura si të tilla ISIS dhe Al-Nusra-Front, shkruan gazeta “NZZ sm Sonntag”.

Këtë veprimtari ai e ka ushtruar gjatë periudhës 2009-2014, përmes një faqeje interneti që e bashkëfinanconte dhe përmes cd-ve që i shpërndante, transmeton albinfo.ch. Policia ka gjetur te ai edhe përmbajtje pornografike.

Personi në fjalë është shprehur i penduar dhe ka deklaruar se ka hequr dorë nga idetë islamike, shkruan gazeta duke iu referuar njerëzve të afërm me të përmendurin.