Dënimi i ish-krerëve të UÇK-së në ballinat e mediave kryesore botërore

Vendimi i Gjykatës Speciale në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit ka marrë vëmendje të gjerë në mediat ndërkombëtare.

Vendimi i Dhomave të Specializuara të Kosovës në Hagë ndaj katër ish-krerëve të Ushtrisë Çlirimtare të Kosovës (UÇK) është pasqyruar gjerësisht nga mediat kryesore ndërkombëtare. Hashim Thaçi, Kadri Veseli, Jakup Krasniqi dhe Rexhep Selimi u shpallën fajtorë për vepra penale të përfshira në aktgjykim dhe u dënuan me burgim. raporton albinfo.ch.

Agjencia ndërkombëtare e lajmeve Reuters  e ka vendosur në fokus dënimin e ish-presidentit të Kosovës, Hashim Thaçi, me titullin: “Former Kosovo president Thaci sentenced to 25 years for war crimes”.

Agjencia Reuters shkruan se ai vazhdon të jetë një figurë e nderuar dhe e respektuar nga shumë shqiptarë të Kosovës, ndërsa vetë Gjykata Speciale është thellësisht jopopullore në vend.

Pamjet nga Prishtina, siç i përshkruan Reuters, tregojnë qartë hendekun mes vendimit të gjykatës dhe perceptimit të një pjese të madhe të opinionit publik. Mijëra qytetarë që po e ndiqnin shpalljen e vendimit në një ekran të madh reaguan me fishkëllima dhe brohoritën “Thaçi, Thaçi”, ndërsa disa prej tyre shpërthyen në lot.

Edhe prestigjiozja britanike The Guardian i ka kushtuar vëmendje vendimit, duke e titulluar raportimin: “Former Kosovo president Thaçi sentenced to 25 years in prison by international court in The Hague”. (The Guardian⁠)

Në Zvicër, gazeta Blick gjithashtu ka raportuar për aktgjykimin, duke vënë theksin te dënimi i ish-presidentit të Kosovës me 25 vjet burgim.

Vendimi ndaj katër ish-krerëve të UÇK-së është pasqyruar edhe nga media të tjera ndërkombëtare, duke e bërë aktgjykimin një prej zhvillimeve kryesore të ditës në raportimet për Kosovën dhe rajonin. (AP News⁠)

Sipas aktgjykimit të shpallur më 16 shtator, Hashim Thaçi u dënua me 25 vjet burgim, ndërsa dënimet për tre të bashkëakuzuarit e tij variojnë nga 13 deri në 25 vjet.

---