David Beckham, pjesë e fushatës kundër sëmundjes së malaries

Ish-futbollisti David Beckham ka folur në nëntë gjuhë në një film të shkurtër, ku bën thirrje për më shumë angazhim për  t’i dhënë fund sëmundjes së malaries.

Fushata me titullin “Malaria duhet të vdesë që miliona të jetojnë”, inkurajon njerëzit që të vetëdijesohen ndaj sëmundjes që vret më shumë se 1 milion njerëz çdo vit.

Në videon e shkurtër, Beckhami duket se flet rrjedhshëm gjuhën spanjolle, arabe, hindi dhe atë mandarine. Zërat që dëgjohen në videon e Beckhamit, u përkasin burrave dhe grave që janë prekur nga malaria.

“Malaria nuk është veç një sëmundje. Është sëmundja më vdekjeprurëse”, ka thënë ish-kapiteni i përfaqësueses së Anglisë. “Ngrihuni dhe thoni: ‘malaria duhet të vdesë’. Një zë duhet të jetë i fuqishëm, por kur flasim së bashku ata na dëgjojnë”, thotë Beckham në fund të kësaj videoje. Duke përdorur teknologjinë e inteligjencës artificiale, producentët mundësuan që zërat të duken të ngjashëm me atë të ish-futbollistit.