Christian Levrat, politikani zviceran me ndikimin më të madh

Në pozitat menjëherë pas tij në ranglistë janë kryesisht politikanët e partive të qendrës, sidomos të CVP/PDC-së si Pirmin Bischof, Filippo Lombardi etj.

Politikanët me ndikimin më të madh nuk janë ata që më së shpeshti i shohim në televizione ose gazeta por disa të tjerë që përmes punës së tyre “të padukshme” nëpër komisione parlamentare formësojnë ligjet që pastaj miratohen nga parlamenti. Dhe, sipas një hulumtimi të gjerë që kanë bërë gazetat “SonntagsZeitung” dhe “Le Matin Dimanche”, politikani më me ndikim në Zvicër është Christian Levrat, kryetar i Partisë Socialdemokrate dhe deputet në Dhomën e Kantoneve.

Në pozitat menjëherë pas tij në ranglistë janë kryesisht politikanët e partive të qendrës, sidomos të CVP/PDC-së si Pirmin Bischof, Filippo Lombardi e ndonjë tjetër. Ndërsa aty nuk janë asnjë nga “skifterët” e SVP-së të cilët janë kaq shumë të pranishëm në opinion. Më së larti nga ta është kryetari i fraksionit parlamentar të kësaj partie, Adrian Amstutz i cili ka zënë vetëm vendin e 15-të.

Ndërkaq, ranglista e publikuar nga gazetat e përmendura dëshmon për një rangim jo të mirë të grave deputete. Kështu, parlamentarja që është ngjitur më së larti, në vendin e njëmbëdhjetë, është Viola Amherd, një deputete shumë pak e njohur në opinion, e CVP-së.

Në top 30-shin e deputetëve me ndikimim më të madh ka rënie të pjesëmarrjes së grave, shkruajnë gazetat. Ndërsa ndikim veçanërisht të ulët kanë parlamentaret nga SVP/UDC-ja. Kjo shihet nga fakti se më së miri prej tyre është ranguar politikania e kësaj partie që vjen nga Gjeneva, Celine Amaudruz e cila zë vendin e 97-të.