Çfarë dihet deri tani për iPhone 13?

Mësohet se iPhone i ardhshëm i Apple ka të ngjarë të quhet “iPhone 13 Line” dhe do të vijë me ca veçori dalluese nga iPhone-t e mëparshëm.

Fillimisht thuhet se iPhone 13 do jenë në gjendje të bëjnë “blur” (turbullt) automatikisht jo vetëm fotot, por edhe videot, duke ofruar opsionin “portrait”, tashmë edhe për video (video-portrait). Kjo mendohet të jetë një nga tre tiparet kryesore të reja të kamerës që do të ketë iPhone. Dy të tjerat do të fokusohen në përmirësimin e regjistrimit të videove dhe mundësive më të mira edituese për foto dhe video.

Sigurisht, edhe kualiteti i kamerës në përgjithësi do të përmirësohet, duke bërë që “edhe fotot në pak dritë” të duken mirë. Bloomberg raporton se iPhone-t e rinj do të kenë një menu filtrash, që do t’u lejojë përdoruesve të aplikojnë një stil unik në fotot e tyre, duke i bërë ato të duken “uniformë” dhe rrjedhimisht, të përshtatshme për një feed të kuruar Instagrami.

Raporti nuk tregon datën e saktë të publikimi, por dihet tashmë se Apple ka tendencë t’i nxjerrë në treg produktet e reja në shtator të çdo viti, me përjashtim të vitit të kaluar, për shkak të pandemisë. Produkte të tjera të reja të Apple që mendohet se janë në punim e sipër për t’u nxjerrë në treg përfshijnë: MacBook Pros të reja të pajisura me Apple Silicon, Apple Watches, AirPods dhe iPads.