Bizneset zvicerane përgatiten për përshkallëzim me Kinën

(KEYSTONE/Urs Flueeler)

Bizneset e vogla dhe të mesme zvicerane (SME), të orientuara drejt tregut aziatik, po zhvendosin prodhimin e tyre në Vietnam, Tajlandë ose Indi. 

Me një vendndodhje të tillë të dytë, kompanitë mund të përgatiten për një përshkallëzim të mundshëm në Kinë, sipas një promovuesi kryesor të eksportit.

“Ne po shohim një prirje: “Kinë + 1”, tha Simone Wyss Fedele, kreu i organizatës së promovimit të eksporteve Switzerland Global Enterprise (S-GE), në një intervistë me Schweiz am Wochenende, përcjell Albinfo.ch.

Diversifikimi i kompanive aktualisht është i fokusuar në rajonalizimin në tregtinë ndërkombëtare, tha ajo. 

“Kompanitë po gjejnë zhvillimin dhe prodhimin për Azinë në Azi, për Evropën në Evropë dhe për Amerikën në Amerikë.  Globalizimi po bëhet rajonal”.

“Njerëzit në Kinë nuk janë më aq optimistë”, thekson tutje ajo.

Një ish-korrespondent zviceran në Shangai shpjegon se si disponimi i popullit kinez është errësuar gjithnjë e më shumë.

Pavarësisht rreziqeve, Kina mbetet shumë e rëndësishme, tha Wyss Fedele.

“Është partneri ynë i tretë tregtar më i rëndësishëm. Në të ardhmen ndoshta do të jetë vendi i dytë më i rëndësishëm pas SHBA-së”.  Në rast urgjence, çdo kompani duhet të dijë se cilin vend të zgjedhë, tha ajo.

“Ne mendojmë se një formim i ngurtë blloku është i mundur, por nuk ka gjasa. Por, nëse bëhet fjalë për këtë, kompanitë zvicerane do të zgjedhin bllokun evropian – ky është reagimi që po marrim – dhe indirekt SHBA.  Pa Evropë asgjë nuk është e mundur”, tha Wyss Fedele. 

“Evropa në tërësi është partneri ynë më i rëndësishëm tregtar dhe do të mbetet i tillë edhe për 20 vjetët e ardhshme”, u shpreh ajo./Albinfo.ch