Bizneset përkrahin taksën për produktet serbe

Oda Ekonomike e Kosovës njofton se ka mbajtur një takim informues me biznese të sektorëve të ndryshëm lidhur me vendimin e Qeverisë së Kosovës për vendosjen e taksës 100% ndaj importit të produkteve nga Serbia dhe Bosnja e Hercegovina.  

Në njoftim thuhet se komuniteti i biznesit përkrah bashkërisht vendimin qeveritar, duke pasur konsiderata për interesin e përgjithshëm shtetëror. 

Bizneset e prekura nga kjo taksë kërkojnë qartësim të afatit kohor të këtij vendimi dhe informim më të detajuar rreth proceseve përcjellëse. 

OEK thotë se bizneset shprehin nevojën për koordinim më të mirë ndërinstitucional për klasifikimin e brendeve ndërkombëtare, mallin që gjendet në depot doganore dhe politikave shtetërore për mbështetjen e prodhimeve vendore.