Partia e Gjelbër kryeson sondazhet në Gjermani

Gjashtë nga dhjetë sondazhe të publikuara në dy javët e fundit, u japin epërsinë të gjelbërve përpara Unionit Kristian Demokrat (CDU), të kancelares Angela Merkel.

Një frymë e re e gjelbër po merr jetë në politikën gjermane. Sipas sondazheve, Partia e Gjelbër Gjermane ka epërsinë vetëm pesë muaj përpara zgjedhjeve.

Kjo është hera e parë që prej qershorit 2019, që i gjen të gjelbrit përpara në sondazhe, transmeton AP, përcjell Albinfo.ch.

Në Gjermani, ndryshe nga vende të tjera të Evropës, ka pasur një qëndrueshmëri më të lartë politike. Partitë simotra të CDU-së në Francë apo Itali, kanë marrë goditje të rënda në votime. Ndërsa, në Gjermani, CDU-ja vazhdon të jetë forcë e parë në vend.

Por, pavarësisht kësaj, hegjemonia e CDU-së në Gjermani mund të thyhet pas 16 vjetëve.

Mesatarisht, të gjelbrit shpallen fitues me 27% të votave. Ky rezultat do të lejonte kandidaten për kancelare, Annalena Baerbock, të krijonte një koalicion për qeverisje. Koalicion, i cili do të ishte i mundur edhe me CDU-në.

Kreu i ri i Kristian-Demokratëve ndërkaq, Armin Laschet, pretendon të vazhdojë frymën e kancelares në largim, Merkel.

Pikat kryesore, ku ky i fundit do të synojë, është mungesa e eksperiencës nga ana e Baerblock. 40-vjeçarja, prej tre vjetësh është nën bashkëdrejtim të të gjelbërve, por nuk ka treguar aftësi të larta lidershipi.

Fushata e saj po përqendrohet kryesisht në reformimin e sistemit. Këtu, përfshihet edhe limitimi i mandatit të kancelarit në Gjermani.

Përtej sondazheve, një fitore e të gjelbërve nuk duket shumë e afërt. Kjo, edhe për pasojë të një vazhdimësie të qetë, të cilën gjermanët e kanë kërkuar përgjatë dekadave.