Biden emëroi ambasadorin në Serbi

Mësohet ser presidenti Joe Biden të enjten emëroi për ambasador në Serbi diplomatin amerikan, Christopher Hill, përcjell albinfo.ch.

Hill u tërhoq nga shërbimi i jashtëm në vitin 2010, pasi shërbeu si ambasador në Irak.

Gjatë karrierës së tij, ai ndihmoi në negocimin e një zgjidhjeje paqeje në vitin 1995 për t’i dhënë fund luftës në Bosnjë dhe ishte kreu i delegacionit amerikan në vitin 2003 në bisedimet me gjashtë vende që synonin të bindnin Korenë e Veriut të hiqte dorë nga programi bërthamor.

Hill ishte ambasador amerikan në Maqedoni, Poloni dhe Korenë e Jugut, si dhe i dërguar special në Kosovë. Ai u emërua ndihmës sekretar Shteti për Çështjet e Azisë Lindore dhe Paqësorit gjatë administratës së George W Bush.

Hill aktualisht është profesor ndihmës në Shkollën e Marrëdhënieve Ndërkombëtare dhe Publike të Universitetit Columbia.

Ai do ta zëvendësojë Anthony Godfreyn, i cili ka qenë ambasador i SHBA-së në Beograd qysh në nëntor të vitit 2019.