Belgjikë, mbahet në paraburgim e dyshuara për spiunazh në NATO

(KEYSTONE/Peter Klaunzer)

Një gjykatë belge ka rrëzuar apelin për lirimin e një shtetaseje kanadeze me origjinë kineze, e dyshuar për spiunazh në NATO.

Prokuroria Federale belge bëri të ditur se e dyshuara, e akuzuar për spiunazh në favor të një shteti të tretë dhe për përfshirje në një organizatë kriminale, do të qëndrojë në paraburgim edhe për një muaj.

Apeli i saj u shqyrtua me dyer të mbyllura nga Dhoma e Aktakuzave, e cila vendosi zgjatjen e masës së paraburgimit.

Gruaja u arrestua në korrik pas kontrolleve të policisë në apartamentin e saj në Mons dhe në zyrën ku punonte në Shtabin Suprem të Fuqive Aleate në Evropë (SHAPE), struktura ushtarake e NATO-s në Belgjikë.

Sipas Reuters, e dyshuara është një grua rreth të tridhjetave, e identifikuar si Claire Z, e cila po kryente një praktikë gjashtëmujore në SHAPE.

Autoritetet belge nuk kanë bërë të ditur se për cilin shtet dyshohet se ka spiunuar apo çfarë informacioni pretendohet se ka siguruar. Hetimi vijon dhe ende nuk është caktuar data e gjyqit.

Nga NATO është deklaruar më herët se nuk ka tregues se aktiviteti i dyshuar ka ndikuar në operacionet ushtarake të Aleancës.

Edhe autoritetet kanadeze kanë deklaruar se po shqyrtojnë proceset e tyre të kontrollit të sigurisë lidhur me rastin.