Belgjika, Franca e Gjermania, aksion të përbashkët kundër kontrabanduesve me migrantë

Një operacion i madh i përbashkët i kryer nga forcat policore të Belgjikës, Francës dhe Gjermanisë dhe i koordinuar nga Europol dhe Eurojust, çoi në shkatërrimin e një prej rrjeteve më aktive të përfshirë në kontrabandën e migrantëve përmes Kanalit të La Manshit me varka të vogla të improvizuara.

Sipas Europol, hetimi u përqendrua në një rrjet kurdo-irak të dyshuar për trafikim të migrantëve të parregullt, kryesisht midis Calais, në Francën veriore dhe brigjeve të Anglisë, transmeton ansa, përcjell albinfo.ch.

Operacioni, i cili çoi në arrestimin e më shumë se 15 trafikantëve që ndodheshin në Gjermani, u nis pas një hetimi të përbashkët që zgjati një vit e gjysmë nën drejtimin e Europolit.

Mes arrestimeve të kryera nga policia gjermane, në bashkëpunim me forcat belge dhe franceze, ishin edhe kreu i bandës kurdo-irake dhe pesë drejtues të lartë të organizatës kriminale.