Bashkatdhetarët vizitojnë Ministrinë e Mbrojtjes në Kosovë 

Një grup i bashkatdhetarëve kanë vizituar sot Ministrinë e Mbrojtjes në Kosovë ku janë pritur nga zëvendësministri i Mbrojtjes, Shemsi Syla. Të kryesuar nga Anita Bardhaj, bashkatdhetarët u njoftuan nga zëvendësministri Syla lidhur me të arriturat, sfidat dhe proceset nëpër të cilat po kalon Ministria e Mbrojtjes dhe FSK, transmeton albinfo.ch.

Me këtë rast, zëvendësministri Syla shprehu falënderimet për vizitën, si një mundësi për të rritur komunikimin dhe ndërveprimin me mërgatën shqiptare për të ruajtur lidhjen me atdheun si dhe për të parë mundësitë për kontributin në politikat zhvillimore si dhe përfshirjen në proceset e rëndësishme të forcimit të rolit të Kosovës në aspektin ndërkombëtar, thuhet në njoftim.

Nga ana e saj, Bardhaj dhe të gjithë mërgimtarët e pranishëm shprehën emocionet dhe përshtypjet e thella për vizitën, duke konfirmuar gatishmërinë e tyre për angazhimet dhe mbështetjen e tyre edhe në të ardhmen për FSK-në, nga vendet ku jetojnë dhe veprojnë.