Arditi mahnit gjermanët me vallëzimin e tij akrobatik

Krahas Arditit, në gjysmëfinalen e spektaklit "Go to dance" shkon edhe vallëzuesi shqiptar nga Zvicra, Fatlum Musliji

Airditi, (emri artistik i Ardit Gjikajt) 30 vjeçari nga Dyseldorfi, me vallëzimin e tij të jashtëzakonshëm ka entuziazmuar mbrëmjen e të enjtes publikun dhe jurinë në spektaklin “Go to Dance” që shfaqet në Prosieben dhe në Sat1.

Paraqitja e tij dhe e partnerit të tij në vallëzim, Benit nga Wupertali me pika breakdance dhe akrobatike ka qenë aq bindëse sa që anëtarët e jurisë njëzëri e kanë kaluar për në gjysmëfinale.

“Ishte aq e fortë, me aq kreativitet”, tha i entuziazmuar anëtari i jurisë, këngëtari i Take That Howard Donald.

Arditi ka ardhur si 13 vjeçar nga Shqipëria në Gjermani ku dhe ka zbuluar pasionin e tij për vallëzimin. Si ish kick-boksier i suksesshëm, ai ka fituar një numër çmimesh në gara kombëtare dhe ndërkombëtare.

Partneri i tij në këtë garë, Beni, thotë: “Për mua secilën herë është mahnitëse. Si po e bën ai këtë që po e bën? A është kjo fare e mundur?”  Dhe, mbrëmë pati rastin edhe publiku të shihte se si Arditi për disa çaste “nxjerr nga funksioni” fuqinë e gravitetit.

 Anëtarja e jurisë, koreografja Nikeata Thompson, e entuziazmuar në kulm nga dueti, shprehu dëshirën të mësonte nga ata: “A mund të mi mësoni këto lëvizje”, i ka pyetur ajo dy të rinjtë. Dhe, ata nuk përtuan. I treguan koreografes së suksesshme disa hapa të koreografisë se tyre.

Tashti, dueti duhet të dëshmohet edhe në gjysmëfinale, që nuk është aspak sfidë e lehtë.  Atje i presin edhe gjysmëfinalistë tjerë po kaq të shkathtë e të talentuar që kanë bindur jurinë dhe publikun. Në mesin e tyre është edhe Fatlum Musliji nga Zvicra me lëvizjet e tij prej roboti. Anëtarj e jurisë, koreografja Nikeata ka lavdëruar Fatlumin të hënën duke i thënë “Për ua ke qenë thjeshtë i freskët dhe inovativ”.