Analiza e DW: Qeveria e re gjermane përballë sfidave globale: Nga Ukraina te SHBA, Kina dhe klima

(KEYSTONE/DPA/Kay Nietfeld)

Qeveria e re gjermane, e udhëhequr nga Friedrich Merz (CDU), përballet me një kontekst ndërkombëtar sfidues, përfshirë tensionet globale, politikat tregtare të Donald Trump dhe luftën në Ukrainë. Partnerët e koalicionit e shohin këtë si një moment historik dhe janë të vendosur të ndihmojnë në formësimin e ndryshimeve globale për të mbrojtur interesat gjermane, shkruan DW.

Në aspektin tregtar, qeveria kërkon të shmangë përshkallëzimin e konflikteve me SHBA dhe shpreson për një marrëveshje afatmesme të tregtisë së lirë. Megjithatë, qëndrimi agresiv i Trump ndaj Evropës e bën këtë një sfidë të vështirë. Në fushën e mbrojtjes, Merz synon pavarësi më të madhe evropiane nga SHBA dhe bashkëpunim të ngushtë me Francën e Britaninë për çështjet bërthamore, ndërsa mbështetja për Ukrainën do të vazhdojë, edhe pse dërgimi i raketave Taurus mbetet i paqartë, transmeton albinfo.ch.

Në marrëdhëniet me BE-në, Merz synon të riparojë lidhjet me Francën dhe Poloninë, por përballja me rritjen e populizmit e vështirëson këtë synim. Ndërkohë, në raport me Kinën, qeveria kërkon të zvogëlojë varësinë ekonomike dhe të mbrojë interesat strategjike.

Çështjet në Lindjen e Mesme paraqesin sfida të mëdha, sidomos përballë urdhër-arrestit ndërkombëtar për Netanyahu, të cilin Merz ka premtuar të mos e zbatojë. Në fund, mbrojtja e klimës mbetet e paqartë: ndërsa neutraliteti i klimës është ende në plan, organizatat mjedisore e shohin qasjen e qeverisë së re si më pak ambicioze, transmeton albinfo.ch.