Ngjarja ndodhi pak pas orës 06:00, kur dy alpinistët po ngjiteshin përmes kreshtës Hörnligrat, në një lartësi prej rreth 3.500 metrash mbi nivelin e detit. Në afërsi të tyre pati rënie gurësh, ndërsa pak më pas njëri prej alpinistëve humbi nga shikimi shoqëruesin e tij dhe njoftoi menjëherë ekipet e shpëtimit, përcjell albinfo.ch.
Organizata kantonale e shpëtimit në Valis angazhoi një helikopter të kompanisë së shpëtimit ajror Air Zermatt. Ekipet kërkuan në zonën ku kishte ndodhur incidenti dhe arritën ta lokalizonin alpinistin e zhdukur pas një kohe të shkurtër.
Megjithatë, ndërhyrja e shpëtimtarëve nuk mundi t’ia shpëtonte jetën. Ai kishte pësuar lëndime fatale si pasojë e rrëzimit.
Identiteti i viktimës ende nuk është konfirmuar zyrtarisht. Prokuroria e Valisit ka nisur hetimet për të sqaruar rrethanat e aksidentit dhe për të përcaktuar se si ndodhi tragjedia në Matterhorn./Albinfo.ch
