Aleancë e përbashkët e mbrojtjes sipas modelit të NATO-s mes Arabisë Saudite, Pakistanit e Turqisë

Foto FB: Presidency of the Republic of Türkiye

Arabia Saudite, Turqia dhe Pakistani kanë krijuar sot një aleancë të përbashkët të mbrojtjes.

Sipas marrëveshjes së nënshkruar, parashihet një pakt i mbrojtjes së ndërsjellë, i cili parashikon se një sulm ndaj njërës prej tyre do të konsiderohet si sulm ndaj të trija vendeve.

Sipas deklaratës së përbashkët, pakti synon “të forcojë parandalimin kolektiv ndaj çdo akti agresioni” dhe “parashikon gjithashtu zgjerimin e bashkëpunimit në të gjitha aspektet e mbrojtjes ndërmjet tre shteteve”.

Nënshkrimi i marrëveshjes erdhi pas një takimi mes kryeministrit turk Recep Tayyip Erdogan, princit të kurorës së Arabisë Saudite Mohammed bin Salman dhe kryeministrit pakistanez Shehbaz Sharif, në Mekë, qytetin më të shenjtë të myslimanëve dhe vendlindjen e Profetit Muhamed, duke i dhënë asaj një simbolikë të fortë politike dhe fetare.

Deklarata thekson se marrëveshja “udhëhiqet nga lidhjet e gjata historike ndërmjet tre shteteve, të bazuara në vëllazërinë e qëndrueshme dhe solidaritetin islamik që i bashkon ato, si edhe mbi interesat e tyre të përbashkëta strategjike dhe bashkëpunimin afatgjatë në fushën e mbrojtjes”.