Albin Kurti i bën thirrje mërgatës: Regjistrohuni sa më parë për të votuar me postë

Kryeministri në detyrë i Kosovës kërkon mobilizimin e diasporës për zgjedhjet e jashtëzakonshme të 7 qershorit, duke thënë se opozita po bllokon proceset politike.

Kryeministri në detyrë i Kosovës, Albin Kurti, i ka bërë thirrje mërgatës që të regjistrohet për të votuar me postë në zgjedhjet e jashtëzakonshme parlamentare që do të mbahen më 7 qershor, transmeton albinfo.ch.

Përmes një video-mesazhi të publikuar në rrjetin social Facebook, Kurti tha se po përballet me pengesa në punën e tij dhe se kundërshtarët politikë, sipas tij, “nuk e respektojnë rezultatin zgjedhor”.

Ai theksoi se procesi i regjistrimit të diasporës për të votuar është shumë i rëndësishëm, duke shtuar se ai dhe ekipi i tij janë “në rrugë të drejtë” dhe nuk do të ndalen së punuari.

“Të vetmen përgjigje ndaj votës qytetare, opozita e kishte bllokadën”, tha Kurti në deklaratën e tij.

Ai gjithashtu u shpreh se janë bërë përpjekje për të shmangur mbajtjen e zgjedhjeve të reja, duke thënë se janë ofruar disa zgjidhje politike për stabilitet institucional.

“Provuam gjithçka. Ishim të vetmit që propozonim zgjidhje me seri ofertash që vendi të mos shkonte në zgjedhje. Refuzim se refuzim”, deklaroi ai.

Në fund, Albin Kurti u bëri thirrje mërgimtarëve që të mos humbin kohë dhe të regjistrohen sa më shpejt për të votuar me postë, duke i inkurajuar gjithashtu që të nxisin edhe familjarët dhe miqtë e tyre të marrin pjesë në procesin zgjedhor./Albinfo.ch

VIDEO

https://www.facebook.com/watch/?v=1470324023987734

---