A po bëhet shumë kritik Xhaka? Mediat zvicerane flasin për pakënaqësi në ekip

Mediat zvicerane: Disa lojtarë ndihen të pasigurt pas kritikave të Xhakës

Kapiteni i Zvicrës, Granit Xhaka, po përballet me pikëpyetje gjatë Botërorit. Kritikat e tij publike dhe ndikimi i madh në ekip kanë nxitur diskutime për atmosferën brenda kampit helvetik, përcjell albinfo.ch.

Teksa po luan ndoshta Kupën e fundit të Botës në karrierë, Granit Xhaka është kthyer në një nga figurat më të diskutuara në Kombëtaren e Zvicrës. Në vend që vëmendja të përqendrohet te arritjet e tij historike me fanellën kuqe e bardhë, debati është zhvendosur te roli i tij si lider dhe ndikimi që po ushtron mbi ekipin.

Pas barazimit në miqësoren ndaj Australisë dhe paraqitjes jo bindëse kundër Katarit, Xhaka ka dalë publikisht me kritika ndaj skuadrës. Sipas raportimeve nga mediat zvicerane, disa futbollistë brenda ekipit nuk ndihen rehat me qasjen e kapitenit, duke e konsideruar atë tepër kritik.

Burime pranë ekipit kanë deklaruar se vërejtjet e shpeshta të Xhakës kanë krijuar pasiguri te disa lojtarë, veçanërisht te më të rinjtë. Madje, disa zëra flasin për një atmosferë që po shkon në një “drejtim toksik”.

Përveç debatit mbi stilin e tij të udhëheqjes, në qendër të vëmendjes është edhe forma e tij në fushë. Në ndeshjet e fundit, mesfushori 33-vjeçar nuk ka pasur ndikimin e zakonshëm në lojën e Zvicrës, duke mos arritur të kontrollojë ritmin e ndeshjes siç ka bërë shpesh në të kaluarën.

Një tjetër çështje që po diskutohet është fuqia e madhe që Xhaka ka fituar brenda federatës dhe ekipit kombëtar gjatë viteve të fundit. Që nga bashkëpunimi i ngushtë me trajnerin Murat Yakin, ndikimi i tij në vendimmarrje është rritur ndjeshëm, gjë që ka shtuar pyetjet nëse ekziston ende një kundërpeshë brenda strukturave të ekipit.

Megjithatë, cilësitë e Xhakës si futbollist dhe lider mbeten të padiskutueshme. Shumë besojnë se kapiteni i Zvicrës mund të reagojë pikërisht në momentet kur kritikat ndaj tij shtohen, ashtu siç ka bërë shpesh gjatë karrierës së tij. /Albinfo.ch

---