A mund të përdoret Euro për pagesa në Zvicër?

Megjithëse valuta kombëtare e Zvicrës është franga zvicerane, në shumë vende mund të paguani edhe me euro. Megjithatë, kursi i këmbimit mund të mos jetë gjithmonë i favorshëm.

Ja çfarë duhet të dini.

Zvicra nuk është pjesë e Bashkimit Evropian, ndaj valuta e saj zyrtare është franga zvicerane – jo euroja. Franga zvicerane konsiderohet gjerësisht si një nga valutat më të qëndrueshme në botë.

Për turistët që udhëtojnë në Zvicër për kënaqësi apo punë, si dhe për punonjësit ndërkufitarë që kanë pak para shtesë, është mirë të dini se tregtarët zviceranë i pranojnë pagesat në euro, por kursi i këmbimit shpesh është i pafavorshëm; prandaj, nëse doni të kurseni para, është gjithmonë më mirë të përdorni valutën vendase.

Ku mund të paguaj me euro në Zvicër?

Mund të paguani me euro në të gjitha qendrat e mëdha tregtare zvicerane, si dhe në shumë dyqane të tjera, siç janë dyqanet e suvenireve, hotelet, bizneset dhe restorantet. Megjithatë, kini parasysh se kusuri do t’ju kthehet gjithmonë në franga zvicerane nëse paguani me para në dorë dhe jo me kartë.

A është ide e mirë të paguash me euro?

Përgjigjja e shkurtër është: jo. Edhe pse mbajtja e disa eurove në xhep nuk është ndonjë katastrofë, shpesh do t’ju ofrohet një kurs këmbimi i dobët kur paguani me euro në Zvicër; prandaj, përgjithësisht këshillohet të paguani sa më shumë që të jetë e mundur në franga zvicerane.

Në fakt, në Zvicër kurset e këmbimit nuk përcaktohen nga banka, por nga partneri juaj i pagesës. Kjo do të thotë se në shumë vende – veçanërisht në zonat turistike – kompanitë përfitojnë nga transaksionet shtesë përmes tarifave shtesë të kursit të këmbimit.

Është më mirë të tërhiqni para

Nëse doni të kaloni pushime me buxhet të kufizuar, pagesa me euro nuk është mënyra më e mirë për të udhëtuar nëpër Zvicër. Opsioni më ekonomik për të siguruar franga zvicerane është tërheqja e parave nga një bankomat (ATM) në vend. Zakonisht, këto bankomate nuk aplikojnë tarifa për tërheqje as për vendasit dhe as për turistët – me disa përjashtime.

Bankomatet e “Euronet” njihen për tarifat e larta në Zvicër, ndaj do të ishte e mençur t’i shmangnit ato plotësisht. Për më tepër, shumë bankomate zvicerane do të përpiqen t’ju aplikojnë tarifa shtesë përmes të ashtuquajturit konvertim dinamik të valutës (DCC). Në përgjithësi, është më e mençur (dhe më e sigurt) të shkoni në një bankë vendase për të tërhequr para në dorë për qëndrimin tuaj në Zvicër. Paraja në dorë është mbret

Mund të argumentoni (dhe do të kishit të drejtë) se mbajtja e një sasie të madhe parash në xhep apo në çantë është shumë e papërshtatshme, për të mos thënë e rrezikshme, pasi ato mund të vidhen lehtësisht dhe nuk do t’i shihni më kurrë (ndryshe nga kartat e kreditit, ku transaksionet e dyshimta mund të kontestohen).

Mund t’i thoni të gjitha këto, por prapëseprapë nuk do t’i bindnit disa zviceranë që të kalonin nga paraja në dorë te kartat, raporton thelocal, transmeton albinfo.ch.

Sipas një sondazhi të platformës së konsumatorëve “Moneyland”, 67 për qind e banorëve të Zvicrës e konsiderojnë paranë në dorë si krejtësisht të domosdoshme, ndërsa 96 për qind e përdorin atë për pagesa.

Në fakt, zviceranët i duan aq shumë monedhat dhe kartëmonedhat e tyre, saqë jo çdo dyqan është i pajisur me terminale pagese (POS), ndërsa të tjerë vendosin një prag minimal për pagesat me kartë. Prandaj, këshillohet që gjithmonë të mbani me vete pak para në dorë – në franga zvicerane – dhe të mos mbështeteni vetëm te përdorimi i kartave, qofshin ato të kreditit, debitit apo parapagimit.

Mbani mend: në Zvicrë mund të paguani me kartëmonedha të mëdha (siç është ajo 100-frangëshe) edhe për artikullin më të vogël. Shitësi thjesht do t’ju kthejë kusurin pa e bërë të gjatë.

---