A i plotëson Vjosa Osmani kriteret për presidente?

Avokati Taulant Hodaj ka komentuar ofertën e Lëvizjes Vetëvendosje, e cila i kërkoi opozitës të propozojë tre kandidatë për president të Kosovës, përcjell albinfo.ch.

Në një postim në Facebook, Hodaj ka vlerësuar si hap pozitiv sinjalin e fundit të VV-së për t’u tërhequr nga dy kandidaturat e saj dhe për t’i hapur rrugë propozimeve nga partitë opozitare PDK dhe LDK.

“Megjithatë, ende ka hapësirë për zgjidhje. E shoh si një hap pozitiv sinjalin e fundit nga Lëvizja Vetëvendosje për t’u tërhequr nga dy kandidaturat dhe për t’u hapur rrugë propozimeve nga opozita PDK dhe LDK. Kjo është një mundësi që nuk duhet humbur”, ka shkruar Hodaj.

Ai ka theksuar se Kosova ka nevojë urgjente për institucione funksionale dhe se kjo mund të arrihet vetëm përmes një marrëveshjeje minimale politike.

“Kosova ka nevojë për një President/e, për një Kuvend funksional dhe për një Qeveri me mandat të plotë dhe kjo arrihet vetëm përmes një marrëveshjeje politike minimale në interes të shtetit. Besoj që tre kandidatura serioze të propozuara nga opozita mund të gjenden pa vështirësi. Një nga emrat që i plotëson kriteret është Vjosa Osmani, por ka edhe figura të tjera të denja”, ka theksuar ai.

Ndërkohë, opinionisti Visar Xani ka publikuar në rrjete sociale tre emra që sipas tij do të duhej të propozoheshin për postin e të parit të shtetit.

“Tre emrat që do duhej të propozoheshin: Vjosa Osmani, Vlora Çitaku, Ramush Haradinaj”, ka shkruar Xani./Albinfo.ch