A është fundi i Xhakës në Arsenal?

Duket se mesfushori shqiptar ka vendosur që e ardhmja të vijojë në Gjermani

Granit Xhaka dhe Arsenali, drejt ‘divorcit’ në fund të edicionit.

Duket se mesfushori shqiptar ka vendosur që e ardhmja të vijojë në Gjermani. Gazetari i njohur, Fabrizio Romano, ka “hedhur dritë” mbi këtë të ngjarje dhe ka konfirmuar që palët nuk do të vijojnë bashkëpunimin.

Nga kjo situatë ka përfituar Bayer Leverkusen, me klubin gjerman që është në bisedime të avancuara me Xhakën. “Aspirinat” kanë përgatitur 15 milionë euro për mesfushorin e Zvicrës.

Ai pritet të nënshkruajë kontratë 4-vjeçare, ndërsa e gjitha do të zyrtarizohet pas përfundimit të këtij edicioni, me skuadrën londineze, që duket se, nuk do të arrijë të fitojë titullin në Angli, edhe pse ishte shumë afër.

Xhaka është pjesë e Arsenalit që prej vitit 2016 kur u transferua nga Borussia Monchengladbach dhe ka luajtur 295 ndeshje, ku ka shënuar 21 gola dhe ka dhënë 29 asiste.

Ai ka arritur të fitojë 4 trofe gjatë kohës së tij në Emirates, përfshirë dy FA Cup dhe dy Community Shield.

---